起初我覺得佛諾依德冇乜料到，乜都話童年陰影造成，邊有咁多童年陰影？
後來發覺成人嘅心結，不論係感情或者事業，九成都係追溯到父母關係。
但係通常父母都係認為子女應該聽自己話，而且人老咗又唔想變，所以通常子女都係冇能力改變父母。咁樣可以點？
通常一個人無論點樣揀，父母引起嘅心結，都係會反影在自己嘅夫妻關係上。好似五指山咁，走唔甩。有啲人更加會重覆父/母嘅故事，自己都唔知道。
夫妻關係嘅問題，會不斷在兩個人之間來回激盪，最後一係變成日日嗌交，一係互相保持距離，兩種僵局。
我以前會諗，咁一個人解決自己嘅心結，係唔係冇乜用？如果我父母或配偶唔想改變，咁自己咪好快俾屋企人拉番轉頭？
我想講一個概念，叫做 “Ring of Energy”。 你原生家庭係一個圈，你自己嘅家庭係另一個圈。
基於長期互動，一家人嘅心理，會產生無形連結，就算彼此冇見，心理上仍然互相影響。家人對你嘅心結，一定會保持態度，或進犯或防守。當然你亦必然對其他家人的心結，架起某種態度。呢種情況往往在無意識下運作着。
但係如果你解開自己嘅心結，你會立即對每個家人嘅印象改觀，你會對某啲行為唔再產生情緒。然後家人對你嘅戒備亦會鬆開，事情就會有轉機。
要知道嘅係，雖然係一家人，每人仍然有各自的靈魂旅程，要負責自己的因果。每人對家人嘅責任係有限度的。你解決自己嘅課題，會降低家人對你情緒嘅影響，但係你冇必要去完全改變家人。